A cewar Kamfanin Dillancin Labaran Hauza, Ayatullah Jawadi Amuli ya bayyana hakan ne a cikin saƙon bidiyo da ya aika zuwa taron tunawa da shahidai 398 daga cikin jaruman shahidan rundunar sojin garin dubun shahidai, wato Amul.
Yayin da yake girmama tunawa da dukkan shahidai, musamman shahidan garin Amul, ya yi nuni da halayen Manja Janar Shahid Amir Sayyid Mas’ud Munfarid Niyaki, inda ya bayyana cewa: "Wannan babban shahidi ya kasance daga wani gida mai asali da daraja na dangin Munfarid, kuma yana daga cikin manyan Sayyidawan Amul. Ya kasance mutum mai tunani mai ’yanci, mai zaman kansa, kuma wanda jama’a suke girmamawa.
Bayan ya kammala tafarkin neman ilimi, ya shiga rundunar soji, inda daga baya ya samu wani muhimmin matsayi, sannan Allah Ya ba shi babban darajar shahada."
Al’ummar Iran ba su taɓa fara kai hari ba
Ayatullah Jawadi Amuli ya jaddada cewa al’adun sadaukarwa da shahada ba su takaitu ga Amul ko arewacin ƙasar Iran kaɗai ba. Ya ce: “Al’ummar Iran ba su taɓa zama masu fara zalunci ko kai hari ba, amma kuma ba za su taɓa saurarawa duk wani mai kai hari ba.”
Ya ƙara da cewa mutanen Amul ma, a babban abin tunawa na shekarar 1360 (1981), bayan da maƙiya suka fara kai hari, sun kare garinsu cikin jarumtaka, inda suka sadaukar da shahidai arba’in.
Ya bayyana cewa wannan abin alfahari zai kasance a rubuce har abada a tarihin wannan ƙasa; abin alfahari wanda har ma a cikin wasiyyar addini da siyasa ta marigayi Imam Khumaini (Q) aka ambace shi.
Tafarkin Annabi (S.A.W.A) da Kare Kai, da Gudunmawar Jama’a wajen Kare Juyin Juya Hali da Ƙasa
Ayatullah Jawadi Amuli, yana mai dogaro da wata ruwaya daga Imam Sadiƙ (A.S.) wadda take cewa Manzon Allah (S.A.W.) bai taɓa kai wa maƙiyi hari cikin dare ba, ya bayyana cewa: "Mu ɗaliban wata makarantar Ubangiji ce wadda ba ta da tamka a lokaci ko wuri."
Ya ce: "Manzon Allah (S.A.W.A), duk da cewa maƙiyansa suna shirin kashe shi, bai taɓa kai musu hari cikin bazata ba, domin Musulunci addini ne na jarumtaka, mutunci da ’yanci. Saboda haka, Musulunci yana koyar da cewa ko da kuna yaƙi da kafiri, ku yi yaƙin cikin mutuntaka, kuma kada ku kauce daga ƙa’idojin ɗan’adam da na Ubangiji."
Kasancewar jama’a da sadaukarwarsu a fannonin kare juyin juya hali da ƙasa
Mai girma Ayatullah Jawadi Amoli ya ɗauki kasancewar jama’a da sadaukarwarsu a fannonin kare juyin juya hali da ƙasa a matsayin wata alama ta taimakon Allah. Ya jaddada cewa: "Allah Maɗaukaki yana kawo muminai zuwa fage domin taimakon addininsa. Wannan tashi da mutane suke yi cikin dare, maza da mata, matasa da manya, shi ne abin da Allah Ya ambata a cikin Alƙur’ani: “Shi ne Wanda Ya ƙarfafa ka da taimakonsa da kuma ta hanyar muminai.” (Suratul Anfal: 62)
Wato, Allah Ya ke kawo mutane domin taimakawa, kuma wannan kasancewa a fagen aiki shi ne ainihin cikar wannan alkawarin Ubangiji."
Daga nan sai ya yi bayani game da tafarkin Amirul Muminina Ali bn Abi Talib (A.S.) a fagen yaƙe-yaƙe inda ya bayyana cewa: "A dukkan yaƙe-yaƙen da Imam Ali (A.S.) ya shiga, har zuwa lokacin da ya samu dama, yana farawa da tattaunawa, shawara da mu’amala, domin jinkirta fara yaƙi.
Ya kasance yana ƙoƙarin kada a fara yaƙin tun farkon safiya, sai dai a samu damar shiryar da zukata da kuma cin moriyar lokacin rahamar Allah a lokacin azahar. Haka kuma, yayin da dare ke kusantowa, hakan yana taimakawa wajen hana yaƙin ya bazu da kuma rage yawan asarar rayuka. Sai dai idan maƙiyi ne ya fara kai hari, kuma bukatar wajibcin kare kai ta samu."
Zurfin alaƙar al’ummar Iran da al’adun Ashura
Ayatullah Jawadi Amoli ya ci gaba da bayaninsa yana mai ishara da zurfin alaƙar al’ummar Iran da al’adun Ashura, inda ya jaddada cewa: "Ƙasa da al’ummarmu al’umma ce ta Husaini, kuma irin wannan ruhin da ya bayyana a cikin gwagwarmayar Sayyidush Shuhada Imam Husaini (A.S.), a yau ma yana nan da rai kuma yana gudana a tsakanin mutanen wannan ƙasa."
Ya bayyana cewa tafarkin Imam Husaini (A.S.) a ranar Ashura yana ɗauke da darussa masu girma na sadaukarwa, imani da tsayawa kan gaskiya.
A yayin da yake bayyana yanayin Imam Husaini (A.S.) a ranar Ashura, Ayatullah Jawadi Amuli ya ɗauki sadaukarwar Sa’id bn Abdullah al-Hanafi a matsayin wani abin tunawa na har abada na biyayya ga wilaya da kare gaskiya.
Ya ƙara da cewa: "Sirrin da ya sa juyin Ashura ya dawwama shi ne tsarkin niyya da sadaukarwar sahabban Sayyidush Shuhada (A.S.). Wannan al’ada ce wadda har zuwa yau take haɗa dubban miliyoyin masu ziyara na Arba’een waɗanda ba za a iya ƙirga adadinsu ba."
Godiya ga kasancewar jama’a a fage
Ayatullah Jawadi Amuli ya ci gaba da godiya ga kasancewar jama’a a fage, inda ya ce: “Muna godiya ga manya, ababen ƙauna, ’yan’uwa, ’yan’uwa mata, ’ya’ya mata da maza, da kowane mutum daga cikinku da ya kiyaye wannan fage kuma ya kasance a cikinsa.”
Ya ƙara da cewa: “Haka kuma muna godiya ga jami’ai waɗanda suka kiyaye wannan gwagwarmaya.”
Kewar abotar shekaru 70 da Shahidin Jagoran Juyin Juya Hali
Ya ci gaba da bayaninsa yana mai ishara da tsohuwar abota ta shekaru saba’in da ya yi da Shahidin Jagora, inda cike da damuwa da hawaye a idanunsa ya ce: "Muna nuna godiya da sanin darajar Jagoran Juyin Juya Hali, kuma muna yi wa shahidinmu addu’a. Wannan ƙaunataccen abokinmu ne wanda tun daga farkon zuwanmu, wato shekaru saba’in da suka wuce lokacin da muka zo Qum, duk da cewa akwai ɗan bambancin shekaru a tsakaninmu, mun kasance abokai da wannan babban mutum mai daraja har zuwa yanzu. Abota ta shekaru 70 ba ƙaramin abu ba ce. Mutum ya rasa abokin da suka yi shekaru 70 suna tare, ba ƙaramin abu ba ne."
Jaddada kiyaye tsaro, zaman lafiya da haɗin kan ƙasa
Mai girma Ayatullah Jawadi Amuli ya bayyana kiyaye tsaro, zaman lafiya da haɗin kan ƙasa a matsayin ɗaya daga cikin manyan buƙatun ƙasar, inda ya jaddada cewa: "Kada, Allah Ya kiyaye, mu bi wata hanya wadda ba ta da yardar Allah a cikinta. Kada ku taɓa bari a fito da maganganun da ba su dace ba daga bakunanku masu tsarki. Saboda haka, idan akwai wani ra’ayi ko wani tsari, to a gabatar da shi cikin yanayi na abokantaka da fahimtar juna. Ku bar wannan ƙasa a tafiyar da ita cikin cikakken zaman lafiya da tsaro, domin mu iya miƙa wannan tsarin Musulunci ga mai shi na asali."
A ƙarshe, ya yi addu’a domin ɗaukakar matsayin dukkan shahidan Musulunci, musamman Shahidin Jagora. Haka kuma ya roƙi Allah Maɗaukaki , Ya haɗa shahidan dukkan sassan Iran, musamman shahidan Minab tare da Sayyidush Shuhada Imam Husaini (A.S.). Ya kuma roƙi Allah Ya sanya iyayensu mata da iyalansu su samu kulawa da ni’imomi na musamman daga gare Shi.
Ra'ayinka